26 april 2011

ådåájggásasj jåhkkåmåhke gahper

Ge majt mån Karinis oadtjuv:






















Mån oadtjuv dáv gahperav! Shit man buorre ja fijnuk dat lij. Suohtas adnet gahperav mij la "sámegahper"-muoduk. Dav máhtáv adnet dábálattjat.

muv bässásj

Buoris vas! 

Dálla l bässásj ja loahpe l vássám, ja vahkko 17 la jur alggám. Muv loahpe le lähkám hávsske. Mánniv maj Guovddagäjnnuj ja danna suohtastalliv Marenijn dajt vuostasj biejvijt. Måj Marenijn årojma sämmi bále Råmsån ja Båddåjon gå lijma unna nejtsutja. Munji dat lij riek suohtas, oadtjuv vuojnnet ja studerit dajt nuorta gáptijt, ja gåk mån lav studerim dajt. Iejvvijiv aj ållo ådå ulmutjijt ja lidjiv Juhl´sav guossidime.

Ållijma sijddaj mánnodagá, ja dijstagá mån ja muv vehka Ruoktoj vuoddjájma. Ruokton lij riek hávsske ja vuogas. Mån lidjiv ienemusát muv unnaoappátjij, stågajma ålggon muohttagin ja tjuojgajma Stuorjulevin. Manniv vas sijddaj duorastagá danen de muohtá ja suv boadnjásj ja áhkko ja áddja båhtin mijá lusi Bårjjåsij. Dat lij suohtas, lij hávsske lagámus fuolkev iejvvit vas. Mån dahkiv oreo-gáhkov ja dav lip bårråm desik någåj!

Dajt mángemus biejvijt lidjiv dåssju sijdan. Lev gårrum ådå gárdijnav muv ladnaj, biktasijt bassam, tjuojggam ja vuojnastállam. Ja dálla tjåhkkåhav Karina lunna tjállemin dáv. Galggiv skåvlån tjåhkkahit tjállet, valla sån muv luoggij ietjas lusi.

Hivás, tjáláv ienep gå sijddaj ålliv!



15 april 2011

Bässásjloahppe!

Japp, dálla lav bässásjloabev oadtjum, hávsske jus mujsta gatjáda. Dálla lav gåjt páhkkimin Guovddagäjnnuj. Lav ruvva gärggam, galgav dåssju páhkkit dábálasj biktasijt. Ja åvddål vuolggin de vierttiv dussjit ja bivtastit. Lidjiv sihtat tjuojggat aj valla iv jáhke dat la nav buorre ájn. Iv la varrestuvvam ájn, snuolgga gåjt gålggå ja gåsåv degu iv diede majt...valla iv gåjt ane tjåddåbákjtasav dálla.  Jáhkáv måj lin mannamin guovte tijma duogen, valla dav iv goassak diede mijá vegajn.


Ietján iv la nav ålojt dahkam dájt biejvijt. Manniv skåvllåj gasskavahko danen gå mij anijma nationella gähttjalimev skåvlån. Lidjiv aj skåvlån iektu ja ij lim ålov mij dahpaduváj. Valla lav gåjt gärggam niellja bargoj, buorre l dat, de iv dárbaha barggat gå le loahpe. 


Lev gåjt jur gattsajt láhkkim rosa bájnojn, ja vuordáv ahte galggi gåjkkåt.





















Dála l akta gåvvå majt lav gåvvim åvdep bierjjedagá dánna Bårjjåsin.

Buorre bässásj didjij gájkajda!

12 april 2011

Gatjálvis didjij

Majt galggabihtit dahkat bässásjloaben? :)


Iesj galgav skalov gehtjatjit Guovddagäjnnuj, majt juo lav nabddám. Gå boadáv sijddaj vas de galgav Rijtsemij ja Ruoktoj. Danna galgav tjuojggat, oaggot, skuhterav vuodjet ja dåssju hávsskudallat. 

Skibás unnarievsak

Buoris! 


Gåk la dijájn? Munji le gåjt häjos, anáv tjåttåbáktjasav, njunnje gålggå degu jåhkå ja muv oajvve dåbddu degu soames tjiektjá dav ålles ájgev. Galggiv gilpostit dán ájllega mij vásij, valla ij dat dåhkkim gå skihppájiv. Suddo lij dat danen gå dat lij sesånga mangemus gilppos munji,  valla ij la majdik dasi dahkat. Jur dálla tjåhkkåhav dánna sijdan tjállemin dárogielbargov skåvllåj. Gåsåv, snusov ja tjáláv...nåv dat manná! Mån iv riek dádjada gåk mån náv skihppájiv, ihkap lev hárjjidallám ilá ålov majt muv rubmaj ij gierda, valla dav iv riek jáhke. Ihkap lav vádtsám ilá skirnnjot dájt biejvijt gå le lähkám báhkka..? Dán ájgen galggá várrit ilá binnáv bivtastit, danen gå dav jáhkká ahte le báhkka valla ij la. 


Sáváv gåjt várresduváv ájllegij mij boahtá, danen lev vuolggemin Guovdagäjnnuj skálluj. Måj iednijn gåjt mannin, ja ihkap unnaoappátja ja perre aj tjuovvi. Ja gå boahtep ruopptot de le bässásjloahpe! Iv dárbaha skåvllåj mánnodagá, yes. Vierttiv dåssju skåvllåbargoj vuostak gärggat. Danen gå loabe mangela skåvllåj  vas boadáv, de ij la moadda vahko åvddål giesseloahpe. Ja tjaktaj de álgáv gymnásaj. Bessiv sisi tjuojggamgymnásaj. 


Majt adnebihtit ådå designa birra?





07 april 2011

duodje sámeskåvlån

Buoris vas diek!

Mån ja muv rádna klásas mánnap maj sámeskåvllåj juohkka mánnodagá. Danna mij duodjuhip, mijá åhpådiddjijn Lise Tapio Pittjajn. Muv mielas dat la riek suohtas sámeduojijn. Muv vuostasj bargov lav jur ållim, ja dat sjattaj sassnevässko gåsi galgav biedjat bádneskurronav,rájddamav,vuopptasprájav ja dakkir lágásj dingajt. Mån lav gårrum sassnijn,danijn ja másjijnajn. Danjij lij gássjel goarrot valla oahppiv mån gåjt juojddáv dassta. Mån lav gåjt riek dudálasj muv bargojn!



Náv dat vuojnnu sisbieles.

Muv rádna lidjijn aj dahkam riek fijna bargojt. Akta la ållim  stuor sássnevässkojn,gáffavuosajn ja nubbe le dahkam ávev majt galggá adnet jeansajde. Näjtso libá álggám gáptij, akta Gárasavvon gáptijn suv unnavielljaj ja nubbe oarjjelgáptijn suv unnaoabbáj. Såj libá aj danij gårrum. Ja akta la snjisskomin vuoddagijt. Muv mielas la nåv suohtas vuojnnet gå iehtjáda duodjuhi.